Të gjithë në provë te Bylisi, afrohet Topllari

Drejtuesit ende nuk po gjejnë dot akordin me trajnerin Ilir Daja për pankinën, por edhe në merkato nuk po tregohen aktivë ashtu siç pritej. Lojtarët e afruar nuk janë të cilësisë së duhur, ndërsa vijnë pothuajse të gjithë nga niveli i Kategorisë së Parë. Së fundmi me mallakastriotët është bashkuar dhe pogradecari Eldjon Topllari.

Sulmuesi liqenor, pas tre sezonesh aktivizimi me Pogradecin në Kategorinë e Parë, tashmë është në kërkim të një aventure të re, pikërisht në një ekip të Kategorisë Superiore. Por, ai do të kalojë në provë nga stafi teknik dhe më pas do të vendoset per te ardhmen e tij.

Sulmuesi i ardhur për provë te Bylisi, Eldjon Topllari (i dyti majtas)

Përveç të ardhurve gjatë ditëve të fundit të merkatos, si; Hasani, Tahiri, Zylyftari, Mahilaj, Topllari, Bualli apo edhe të tjerë, të gjithë do të kalojnë në “shoshë” nga stafi teknik. Askush nuk e ka vendin e sigurt te Bylisi për sezonin e ri. Përzgjedhja do të jetë e rreptë, pasi presidenca mallakastriote kërkon të ndërtojë ekip konkurrues për sezonin 2015-2016 ku skuadra do të militojë në Kategorinë Superiore.